Author: admin

Реакција и Апел

Реакција и Апел по повод говорот на претседателката на Унијата на жени на ВМРО-ДПМНЕ на 12 Годишната конференција на Униjа на жени на ВМРО-ДПМНЕ

На 20.12.2009 беше одржана 12 Годишна конференција на Унија на жени на ВМРО-ДПМНЕ под мотото “Вистински вредности во вистински раце“. Во своето обраќање на конференцијата, претседателката на Унијата,  Косана Николиќ Мазнева потенцирајќи ги нивните заложби за зачувување на “традиционалните семејни вредности“, како и потенцирајќи ги “владините заложби за многудетно семејство и воведување на веронауката во образованието“, промовираше и хомофобичен говор како стратегија на ширење на страв со кој директно и недвосмислено беше нападнат концептот на истополови заедници и брак и истиот беше окарактеризиран како закана за општеството и извор на загрозување на традиционалните семејни вредности.

Коалицијата за заштита и промоција на сексуалните и здравствените права на маргинализираните заедници најостро реагира на ваквиот говор кој претставува манипулација со состојбата и правата на една од најмаргинализираните заедници во општеството, во момент кога треба да се донесе законот за борба против дискриминација и кога допрва во земјата почнува да се иницира дебата и да се крева јавната свест за концептот на недискриминација. Загрижувачка е ситуацијата која засведочува и потврдува една континуирана пракса на ширење на хомофобија од страна на демо-христијанската централно-десничарска владеачка структура, започнувајќи од хомофобичните изјави на актуелниот министер за надворешни работи, Антонио Милошевски, уште во предизборната кампања во 2006 година, па преку актуелниот Претседател на државата во неговата предизборна кампања и конечно со оваа изјава на претседателката на Унијата на жени на ВМРО-ДПМНЕ.

Промоција на документарецот “Треба да Знаеш за Мене”

Денес е 17-ти Декември, Меѓународен ден за борба против насилството врз сексуалните работници.“

Во Македонија, како и низ светот, сексуалните работници се истуркани на маргините од општеството преку комбинација од предрасуди, дискриминација, и насилство. Навредите и омразата ги обременуваат нивните животи, доминираат во медиумските извештаи, и го насочуваат пристапот на институциите кон нив. Но, животот на сексуалните работници се состои од многу повеќе, и продавањето сексуални услуги не го оправдува негирањето на основните човекови права, кои треба им бидат загарантирани на сите луѓе подеднакво.

“Треба да Знаеш за Мене” е приказна за искуствата и желбите на сексуалните работници на и вон улицата, раскажана од прва рака. Справувајќи се со малтретирањето и насилството од клиентите, макроата и полицијата, сексуалните работници се трудат да му се спротивстават на негативниот општествен став со тоа што гласно проговараат и се борат за своите основни права.

Овој филм повикува на нула толеранција за насилството против сексуалните работници, соодветна истрага и гонење на сторителите, и координиран одговор од институциите за вистинските потреби на сексуалните работници.

Погледнете и превземете акција: http://hub.witness.org

Активности по повод 17 -ти декември

По повод 17 Декември-Ден за борба против насилството врз Сексуалните работници/чки и 10 Декември - Ден на човековите права во рамките на Програмата за поддршка на Сексуални работници/чки на ХОПС со цел да се одбележат овие денови се организира Недела на човекови права 10-17 Декември со разни активности во Дневниот центар и на терен.

На 10 декември се спроведе едукативна работилница на која беше прикажан филм со тематика човекови права а потоа имаше кратка презентација за значењето на денот.

Понеделник (14.12) ќе се спроведе работилница - Законска регулатива и СР и придобивките од легализација, вторник (15.12) ќе се прикаже филмот - Треба да знаеш за мене и ќе има психо-социјална работилница за насилството и емоциите поврзани со него.

Во среда (16.12) ќе се изработува постер на тема 17 Декември и човековите права, а во четврток (17.12) повторно ке се прикажува филмот - Треба да знаеш за мене, ќе има презентација за значењето на денот, мала забава организирана од Сексуалните работници/чки по што ќе се делат црвени чадори (акотивностите се од затворен тип).

На терен ќе се дели Манифестот на СР и летоци со кратка приказна за 17 Декември.

Покана за панел дискусија

Коалицијата за заштита и промоција на сексуалните и здравствените права на маргинализираните заедници, во соработка со Х.Е.Р.А како партнер-организација во Коалицијата, има за чест да ве покани на панел дискусија на тема "Сексуалните и здравствените права и потребите на луѓето кои живеат со ХИВ во Македонија". Панел дискусијата ќе се одржи на 15.12.2009, вторник, во Холидеј Ин, со почеток од 11.00 часот.

Се надеваме дека ќе не почестите со вашето присуство со што сите заедно би развиле плодна дискусија и би иницирале јавна дебата по однос правата на луѓето кои живеат со ХИВ во Македонија и борбата против нивна стигматизација.

 

Коалицијата објави е-билтен

Објавено е првото издание на е-билтенот на Коалицијата за заштита и промоција на сексуалните и здравствените права на маргинализираните заедници. Во овој број на билтенот ќе најдете информации за активностите иницирани од  Коалицијата или нејзините членки во последниве три месеци, a поврзани со сексуалните и здравствените права на ЛГБТ популацијата, Сексуалните работници/чки, Корисниците на дроги илицата кои живеат со ХИВ/СИДА. Превземете го билтенот.

Денеска е Светски ден на борба против СИДА-та

По 21-ви пат, денеска, светот ќе го одбележи меѓунаордниот ден посветен на борбата против СИДА-та. Групата што работи на оваа тематика при Обединетите нации, а во која се обединети напорите на 5-те агенции UNAIDS, UNHCR, WHO, UNFPA и UNIFEM во соработка со невладината мрежа Y-Peer, невладината Х.Е.Р.А и фестивалот ТАКСИРАТ, организира бројни активности во текот на целиот ден.

Целта е да се поддржат напорите за превенција на пандемиското ширење на ХИВ, да се подобрат условите за лекување и услугите, да се елиминира стигматизацијата и дискриминацијата на луѓето кои живеат со ХИВ/СИДА.
 
Темата на Светскиот ден за борба против СИДА-та се фокусира на аспектот на човековите права, под слоганот
“Ги живеам моите права. Стоп за сидата. Одржи го ветувањето”.

Со седум нови случаи од кои шест ХИВ-позитивни и еден заболен, Македонија и на овогодинешниот Меѓународен ден на борба против сидата се смета за земја со ниска преваленција.

Покана за промоција на Декларација за сексуални права

Годинава Х.Е.Р.А. ја издаде на македонски јазик „Сексуални права: Декларација Меѓународната федерација за планирано родителство“ (IPPF-International Planned Parenthood Federation). Се работи за документ којшто на најсеопфатен начин во дава преглед на сексуалните права во рамката на човековите права. Сметаме дека принципите и дефинираните права во Декларацијата претставуваат основа за признавање и унапредување на сексуалното и репродуктивното здравје во Македонија.

Затоа имаме чест да ве поканиме на промоцијата на ова издание кое ќе биде попратено со  трибината „Глобалната перспектива на сексуалните права и предизвиците во Македонија“ што ќе се одржи на 19. 11.2009 (четврток) во Точка во 1300 часот. Учесници во дискусијата ќе бидат Силва Пешиќ, национален советник за човекови права при Канцеларијата на постојаниот координатор за ОН, Жарко Трајановски експерт за сексуални права и Драшко Костовски како претставник од Х.Е.Р.А.  Програмата стои во прилог.

Ќе ни биде задоволство ако земете директно учество во дискусијата и ги истакнете искуствата на вашата организација во полето на сексуалните права.

 

Панел дискусија “Корисниците на дроги во медиумите”

ХОПС – Опции за здрав живот во соработка со Коалицијата за промоција и заштита на СЗП на маргинализираните заедници, и со поддршка на Набљудувачката мисија на ОБСЕ во Македонија, има чест да Ве покани на панел дискусија:

‘Корисниците на дроги во медиумите – стигма и дискриминација‘

Панел дискусијата ќе се одржи на 17.11.2009 (втроник) во Клуб на Новинари, од 10:30ч до 12:30ч. Свои излагања ќе имаат: Ирена Цветковиќ, истражувач;  Лазар Бундев, активист за правата на корисниците на дроги; Славица Кнежевиќ- Гајдазис, невропсихијатар и субспецијалист за зависности, а средбата ќе биде модерирана од Жарко Трајановски, истражувач, блогер, колумнист и активист.

Покана за Прес Конференција

Коалицијата за промоција и заштита на сексуалните и здравствените права на маргинализираните заедници (ХОПС, ХЕРА, ЕГАЛ, ММНШ, СТАР, ИЗБОР) во четврток, 05.11, во 12.00 часот, во просториите на НВО Инфоцентар (Никола Т    римпаре бр. 18 1/5) ќе организира прес конференција по  повод објавувањето на Годишниот извештај за ситуацијата со сексуалните и здравствените права на маргинализираните заедници.

Збор на прес конференцијата ќе земат Славчо Димитров, Координатор на Коалицијата и Жарко Трајаноски, експерт за човекови права и автор на Извештајот.

Годишниот извештај е произлезен во согласност со една од долгорочните стратешки цели на Коалицијата, односно да врши постојано мониторирање, документирање и известување за состојбата со сексуалните и здравствените права на припадниците на маргинализираните групи, како што се лезбејките, гејевите, бисексуалците и трансродните лица, мажите кои имаат секс со мажи, корисниците на дроги, сексуалните работници/чки и лицата со ХИВ/СИДА. Како резултат на едногодишниот процес на мониторирање, беа документирани 40 случаи во кои се индицираат флагрантни кршења на сексуалните права и здравствените права на припадниците на наведените групи. За жал, голем дел од лицата кои пријавија индивидуални случаи на повреда на сексуалните и здравствените права не сакаат да поведат никаква постапка, ниту пак да се известува за нивниот случај, затоа што немаат доверба во институциите на системот.
Сознанијата од овој првичен извештај се засновани не само врз документираните индивидуални случаи (кои беа пријавени кај членките од коалицијата, идентификувани од страна на мониторите или дознаени од медиумите), туку и врз постојаното следење на политиките и легислативата која  непосредно или посредно влијае на промоцијата, остварувањето и заштитата на сексуалните и здравствените права на припадниците на маргинализираните групи.

Подетални информации околу конкретни случаи, вклучително со барањата и препораките кои произлегуваат од овој извештај, прв од ваков вид, ќе бидат презентирани на самата прес конференција.

Реакција по повод доделувањето благодарница на Вечер

Две недели по извештајот на Европската комисија за Македонија во кој беа упатени сериозни забелешки по однос прашањето на недискриминација во земјата (посебно околу дискриминацијата врз основа на сексуална ориентација), Претседателот на Р.М, Ѓорге Иванов му врачи благодарница за посебни заслуги во борбата против дискриминација на весникот и човекот кои во Македонија веќе со традиција го шират најопасниот говор на омраза кон хомосексуалците, Албанците и сите маргинализирани заедници. Да потсетиме, во својата популистички ориентирана предизборна кампања, Иванов го негираше постоењето на дискриминација врз нехетеросекуалците во Македонија и тврдеше дека истите се саможигосуваат.

Уште позагрижувачки е фактот дека оваа благодарница беше доделена од страна на организација која е еден од основачите на Сојузот “Македонија без дискриминација“, во рамки на изложба на фотографии на тема Македонија без дискриминација, организирана во партнерство со Центарот за човекови права и разрешување на конфликти, Македонскиот центар за меѓународна соработка и Министерството за труд и социјална политика.

Панел дискусија „ЛГБТ во медиумите“

ХОПС – Опции за здрав живот во соработка со Коалицијата за промоција и заштита на СЗП на
маргинализираните заедници, и со поддршка на Набљудувачката мисија на ОБСЕ во Македонија, има
чест да Ве покани на панел дискусија:

„ЛГБТ во медиумите – заштита од говор на омраза“

Панел дискусијата ќе се одржи на 30.10.2009 (петок) во хотел Арка (мала сала), од 10:30ч до
12:30ч. Свои излагања ќе имаат: Славчо Димитров, истражувач;  Беким Кадриу, експерт за човекови
права; Тамара Чаусидис, Совет на честа при здружението на новинари на Македонија; Кочо
Андоновски, активист за правата на ЛГБТ, а средбата ќе биде модерирана од Жарко Трајановски,
истражувач, блогер, колумнист и активист.

ЛГБТ правата треба да се почитуваат

На 14 октомври 2009 година, Европската комисија ги објави своите извештаи за 2009 година за напредокот на земјите кои аплицираа за членство во ЕУ - Хрватска, Република Македонија, Турција, Албанија, Босна и Херцеговина, Црна Гора, Србија и Косово. Во извештајот се потенцира напредокот направен од страна на овие земји кон ЕУ интеграцијата, како и предизвиците со кои се соочуваат. ИЛГА-Европа со задоволство гледа на референците во извештаите  кои се однесуваат на човековите права на лезбејките, гејовите, бисексуалците и транссексуалците .

ЛГБТ темите се опфатени во сите извештаи и во нив се користат построги критериуми од страна на Комисијата во однос на повредите на човековите права на ЛГБТ луѓето и за неисполнувањето на  стандардите  на европските партнерства од страна на државите - апликанти. Исто така, позитивно што се  забележува дека во извештаите се дадоа конкретни препораки до државите да воведат анти-дискриминаторските закони и политики, кои се во согласност со барањата на ЕУ. Во извештаите, исто така, се потенцира потребата во пракса да се подигне нивото на заштитата против дискриминацијата  во земјите каде што законите се донесени (Хрватска, Србија). Комисијата конкретно ги критикуваше владите за неуспехот да се обезбеди адекватна заштита на учесниците на белградскиот прајд кој доведоа до откажување на настанот, како и за повреда на слободата на изразување и здружување во фамозниот случај на Ламбда од Истанбул, Турција.

Панел дискусија-Сексуалните работници во медиумите

ХОПС – Опции за здрав живот во соработка со Коалицијата за промоција и заштита на СЗП на маргинализираните заедници, и со поддршка на Набљудувачката мисија на ОБСЕ во Македонија, има чест да Ве покани на панел дискусија:

‘Сексуалните работници во медиумите – правото на приватност е човеково право‘

Панел дискусијата ќе се одржи на 21.10.2009 (среда) во хотел Арка (мала сала), од 10:30ч до 12:30ч. Свои излагања ќе имаат: Жарко Трајановски, истражувач;  Зоран Бојаровски, новинар;  Елена Стојановска, Дирекција за заштита на јавни податоци; Марија Тошева, ХОПС, а средбата ќе биде модерирана од Ирена Цветковиќ, истражувач, колумнист и активист.

Одржана работилница со новинари

На 04.10.2009, во Клуб на Новинари во Скопје, ХОПС во соработка со Коалицијата за промоција и заштита на СЗП на маргинализирани заедници,  спроведе работилница со новинари на тема ‘Медиуми, не-дискриминација и маргинализираните заедници‘.

Целта на работилницата беше да новинарите добијат информации за ЛГБТ популацијата, Сексуална  работа и Корисниците на дрога во Македонија, да се воспостави дијалог помеѓу невладиниот сектор и новинарите во врска со наведените теми и да се разгледа  и потенцира  улогата на медиумите во борбата против стигмата и дискриминацијата, особено насочена кон маргинализираните групи.

Настанот е дел од пошироки активности кои опфаќаат истражувачки дел на медиумите и маргинализираните заедници, работилници со новинари и тематски панел дискусии. Активностите финанскиски се поддржани од Набљудувачката Мисија на ОБСЕ во Македонија.