Author: admin

Реакција до медиуми

Коалицијата ’Сексуални и здравствени права на маргинализираните заедници“ најостро реагира против сензационалистичкото, стереотипизирачко и стигматизирачко пренесување на информациите поврзани со последните податоци за состојбата со ХИВ/СИДА во Македонија, а кои беа објавени во дел од македонскиот медиумски простор на 30.11.2010.

Сензационалистичкиот пристап во пренесувањето на информациите беше евидентен во фактот што голем дел од насловите од весниците ширењето на ХИВ вирусот и СИДА го доведоа во непосредна врска со хомосексуалноста, односно лицата со поинаква сексуална ориентација и идентитет. По однос на ваквата стратегија на информирање и реторика реагираме врз основа на неколку причини.

Прво, податоците кои се пренесени се однесуваат на мал процент на мажи кои имаат секс со мажи, а кои претставуваат категорија во употреба за целите на епидемолошката евиденција и стратегиите на превенција. Мажите кои имаат секс со мажи не може и не смеат да бидат изедначени со хомосексуалците, затоа што во првиот случај станува збор за сексуално однесување и акти, додека во вториот за самоидентификација и самодефиниран сексуален идентитет.

Понатаму, овие бројки сами по себе не пренесуваат никаква квалитативна, нити пак суштински аналитичка информација по однос прашањето за пренос на вирусот, бидејќи истите не се споредени со бројките од претходните години, со бројките во светски размери, и не се воопшто доведени ниту во врска со културните, социјалните, бихевиоралните фактори. Голото повторување на бројки доведува единствено до слепа циркулација на стереотипи и ’факти’ без притоа да се разгледуваат нивните причинители и ефективно да се застане во борба против негативните фактори и структури.

Како трето би сакале да нагласиме дека преносот на вирусот не се поврзува со категории луѓе, карактери и идентитети, туку единствено со видови на однесување. На тој начин, би сакале да повториме уште еднаш, не постојат ризични категории на граѓани, постојат единствено ризични однесувања кои можат да бидат подеднакво присутни кај сите луѓе без разлика на нивните специфики и разлики.

Изјава на лица кои живеат со ХИВ

И денес, на 1 Декември 2010, Светскиот ден на борбата против СИДА, медиумите не ќе можат да направат јавно интервју со нас, лицата што живеат со ХИВ, поради нашиот основан страв да го откриеме својот личен идентитет. Затоа, го избравме овој начин да ги искажеме јавно нашите ставови во врска со потребите на нашата заедница.

На овој ден, најнапред сакаме да изразиме искрена благодарност до сите организации, здравствени институции – пред сè Клиниката за инфективни болести – како и поединци што работат на полето на ХИВ и СИДА и се залагаат за нашите права. Им искажуваме благодарност на Владата и Министерството за здравство за она што досега е остварено: се разговараше за внесување на лековите од антиретровирусната терапија на позитивната листа и е донесено решение во иднина државата да ги покрива трошоците за нашата терапија, која сè до крајот на оваа година ни беше достапна само благодарение на донациите на Глобалниот Фонд. Искрено го поздравуваме конечното донесување на законот против дискриминација, пред сè во делот што се однесува на забраната на дискриминација врз основа на здравствената состојба, но притоа будно ќе го следиме процесот на неговата примена, ставајќи акцент врз нашата заедница.

За жал, нашава порака мора да ги одбележи и оние состојби што се причина за наша голема загриженост.

Меѓу нив, како прво и најбитно, во земјава сè уште не е воспоставен интегриран државен систем за обезбедување на антиретровирусната терапија. Во нашиот случај, и најмало доцнење или прекин на терапијата може директно да ги загрози нашето здравје и успешноста на истата а со тоа и квалитетот и должината на нашиот живот;

Марш на толеранцијата 2010

По повод Меѓународниот ден на толеранцијата, 16-ти ноември, околу стотина граѓани кои учествуваа на Маршот на толеранција оваа година од Музејот на град Скопје до плоштадот "Мост" на самиот влез на Старата Скопска Чаршија, апелираа за политичка толеранција и конструктивен дијалог помеѓу сите креатори на јавната политика, јавното мислење и вредности.

Организаторите на Маршот кој се одржа под мотото "Правда, слобода, еднаквост" -  Хелсиншкиот комитет за човекови права, Плоштад Слобода,Q, Civica и Цивил побараа меѓуетничка толеранција и почитување на етничките, културните и религиозните разлики во Македонија, и многу поодлучно дејствување за искоренување на дискриминација по сите основи.

Кочо Андоновски од Хелсиншкиот комитет, рече дека "дискриминацијата врз основа на политичките убедувања и припадност беше најжестока" и апелираше за ставање крај на насилството против активистите посветени на борбата за човекови права.

Гордана Несторовска од Хелсиншки комитет ги повика студентите, кои отсуствува од маршот, како група која треба да започнува иницијативи, да се приклучат во борбата за ново демократско општество, ослободено од дискриминација.

"На овој ден, ние имаме изјава од Министерството за труд и социјална политика, што јасно кажува дека хомосексуалноста нема да биде прифатена како нормална појава. Тоа доаѓа од самата институција која треба да ја спречи дискриминацијата и  да го спроведе законот против дискриминација", рече Славчо Димитров од Коалицијата за заштита на маргинализираните заедници.

Претставници на дипломатскиот кор стационирани во Македонија, пратеници од неколку политички партии, претставници на невладини организации и мал број граѓани земаа учество во маршот.

НЕ! за хомофобијата во образованието

БАРАЊЕ до Министерот за образование

Имајќи предвид дека веќе со години во македонскиот образовен систем (основното, средното и високото образование) се публикуваат учебници кои служат за целите на наставата, а во кои се презентираат ставови и сознанија поврзани со сексуалноста и сексуалната ориентација кои се научно незасновани, застарени и идеолошки обоени;

Имајќи ги предвид 10-та ревизија на Меѓународната Класификација на Болести (МКБ-10), усвоена од страна на Светската здравствена организација – СЗО, во која под ознаката F66 Психолошки растројства на обноските поврзани со сексуалниот развој и ориентација и други растројства експлицитно напоменато стои дека дека ‘сексуалната ориентација сама по себе не се смета за растројство’, како и DSM- IV класификацијата објавена 1973 година од Американското Здружение на Психијатри во која хомосексуалноста исто така не се наоѓа на листата на ментални растројства , а кон кои се придружуваат и одлуките на Македонската лекарска комора и Македонската асоцијација на психијатри;

Имајќи предвид дека ваквите текстови претставуваат опасност и обид за манипулација на образованието за целите на ширење на хомофобија, говор на омраза и поттикнување на негативни предрасуди и социјално исклучување на хомосексуалците;

Имајќи го предвид фактот дека ваквите текстови претставуваат сериозно прекршување на основните национални и интернационални одредби со кои се забранува хомофобијата и најстрого казнува секаков вид на говор на омраза, вклучително со Лисабонскиот Договор, член 5б, каде што експлицитно е нагласено дека “во дефинирањето и имплементирањето на сопствените политики и активности, Унијата ќе се стреми кон борба против дискриминацијата, заснована на пол, раса или етничко потекло, религија или верување, попреченост, возраст и сексуална ориентација“. Во оваа насока и чл. 3 од новоусвоениот Законот за спречување и заштита од дискриминација во Македонија, со кој најстрого е регулирана дискриминацијата на сите граѓани врз многубројни основи, вклучително и врз основа на сексуалната ориентација или родов идентитет, истакнува дека “се забранува секоја директна или индиректна дискриминација, повикување и поттикнување на дискриминација и помагање во дискриминаторско постапување врз основа на пол, раса, боја на кожа, род, припадност на маргинализирана група, етничка припадност, јазик, државјанство, социјално потекло, религија или верско уверување, други видови уверувања, образование, политичка припадност, личен или општествен статус, ментална и телесна попреченост, возраст, семејна или брачна состојба, имотен статус, здравствена состојба или која било друга основа која е предвидена со закон или со ратификуван меѓународен договор“.

Имајќи предвид дека ваквите текстови не ги почитуваат сознанијата, одредбите и прогласите на цела низа релевантни институции во доменот на медицината и психологијата и психијатријата, со чинот на патологизација на хомосексуалноста, а во книги кои се користат како учебник во средното образование, активно учествуваат во дискриминаторската пракса на ширење на хомофобични изјави , и тоа помеѓу лица кои допрва го стекнуваат суштинското образование и кои активно учествуваат во консолидацијата на македонското општество.

Со оглед на сето гореспоменато, ние долупотпишаните организации, установи и индивидуи, бараме од Министерството за образование:

    * итно повлекување на сите учебници од ваков тип од нивна понатамошна употреба во наставно-образовниот процес како нужна превентивна мерка за спречување на идните штети кои произлегуваат од нивната употреба (Костова Марија. Педагогија за трета година гимназиско образование. Скопје: Просветно дело, 2005; Темков Кирил. Етика за втора година гимназиско, Просветно Дело 2004; Чадловски Георги. Психијатрија. Скопје, Просветно дело: 2004; Чадловски Георги. Медицинска психологија. Скопје, Просветно дело: 2004; Шкариќ Олга. Развојна Психологија . Скопје, Филозофски факултет: 2004;)
    * Министерството за образование да спроведе соодветни санкции за авторите и рецензентите на учебниците и да востанови механизми за избегнување на вакви состојби при рецензирањето на нови учебници и да организира и да спроведе обуки на лицата одговорни за одобрување на наставно – образованите програми и соодветните учебници
    * Да воспостави систем за спроведување на санкции за сите кои поттикнуват хомофобични ставови во рамки на наставно-образованиот ситем во Република Македонија.
    * Министерството да спроведе систематска ревизија на целокупните образовни програми со што би се коригирале и спречиле сите можности за хомофобија и секаков друг вид на говор на омраза и дискриминација во образовниот систем.

Со почит,

Коалиција ’Сексуални и здравствени права на маргинализираните  заедници’

Реакција по повод текстот „Знамиња“ објавен во Вечер

Реакција против хомофобичниот говор на омраза на г-нот Драган Павловиќ - Латас

Почитувани,
Коалицијата за сексуални и здравствени права на маргинализираните заедници најостро реагира на колумнистичкиот текст објавен на 18.10.2010 во Вечер со наслов Знамиња, а потпишан од Драган Павловиќ Латас. Коалицијата го осудува хомофобичниот говор на омраза со кој се стигматизираат нехетеросексуалците преку негативно стереотипизирање и креирање на ирационален страв кај општата јавност од истата група луѓе.

Додека Советот на Европа ја слави годишнината од усвојувањето на Европската конвенција за правата на човекот, ние во Македонија со жалење можеме да утврдиме дека принципите на човекови права, еднаквост и недискриминација се сеуште под сериозен удар и закана. Погорепосочениот текст сметаме дека претставува парадигматичен удар врз правото на еднаквост на луѓето со нехетеросексуална ориентација. Во текстот се експлоатираат негативни стереотипи и предрасуди кон хомосексуалците и се поттикнува страв и нетрпеливост кон оваа група на луѓе како „закана“ и „опасност“, не само за граѓаните на Република Македонија, туку и за целиот човечки род. Со ваквиот говор се загрозува  нивната безбедност и право на достоен живот ослободен и заштитен од дискриминација.
Она што посебно загрижува во последниов од низата хомофобични написи на Д.П.Латас е имплицитното одобрување на насилниците кои на најбрутален начин се обидоа да ја попречат Парадата на гордоста во Белград, кои ја нападнаа полицијата, го демолираа центарот на Белград, при што беа повредени стотина полицајци и граѓани.

Конечно, истиов текст не само што ја поттикнува нетрпеливоста и стигматизацијата кон луѓето со поинаква сексуалност - неосновано претставени како преносители на ХИВ и опасност за наталитетот - туку, во исто време го поттикнува и стравот и стигмата кон луѓето кои живеат со ХИВ/СИДА и кон сите индивидуи кои не учествуваат во репродуктивната национална и биолошка матрица.

Коалицијата ги повикува сите државни институции, медиумите и општата јавност одлучно да застанат и да го осудат хомофобичниот говор со кој се подриваат основните демократски принципи, еднаквоста, правдата и недискриминацијата.
Коалицијата бара од Владата да изготви посебна програма за борба против хомофобијата и социјалното исклучување на лицата со поинаква сексуалност, која ќе содржи конкретни активности за борба против хомофобичниот говор на омраза, вклучително и законски измени кои ќе овозможат негово препознавање и санкционирање.