СЕКСУАЛНИТЕ МАЛЦИНСТВА, РОДОТ И МЕДИУМИТЕ Анализа на медиумското покривање на темите поврзани со ЛГБТИ заедницата и родово заснованото насилство

Оваа анализа има за цел да понуди релевантни податоци, анализи и знаења за хегемонистичките стратегии на врамување, застапеност и дискурзивна конструкција на сексуалните и родови малцинства во традиционалните и онлајн медиумите во Северна Македонија, да понуди трансформации и можен напредок на овие медиумски практики низ годините и да изготви препораки што се однесуваат на медиумите, регулаторните тела за медиуми, донесувачите на одлуки и активисти за човекови права заради подобрување и трансформација на хегемониските медиумски дискурси и репрезентации на ЛГБТИ заедницата.

Оваа анализа е насочена кон откривање на начините на кои се конструираат и претставуваат (репрезентираат) определени општествени групи како лезбијките, геј-мажите, бисексуалците, трансродовите лица, жените и маргинализираните жени. Репрезентацијата се однесува на јазикот и сликите што се користат во текстуалните или во говорните манифестации со цел обликување на значењето на одредени општествени групи и создавање перцепција во „општата јавност“ за нив.

Нашата анализа ја одбира перспективата на диверзитет. Овој теориски концепт ја надминува замката на непрепознавање на општествено конструираните и патријархалната природа на системите, меѓу кои и системот на „род“, типична за перспективата на еднаквост. Сепак, оваа перспектива не го игнорира фактот дека „мажественоста“ и „женственоста“ се општествени конструкти како што е случајот со перспективата на разлика. Перспективата на диверзитет ја надминува и деконструира исклучувачката логика на и/или концептот и е апликативна за анализа на репрезентација на родовите и сексуалните малцинства во медиумските дискурси.