31 Oct Време е и мажите да се соочат со несаканите ефекти на контрацепцијата
Веста дека последната верзија на инјектираната машка контрацепција е високо ефективна е навистина фантастична. При тестирање на 320 мажи, истражувачите дојдоа до заклучок дека во период од една година, ефективноста е дури 96% во превенирањето на бременост. Портпаролот на Светската Здравствена Организација изјави: “Студијата откри дека хормонската контрацепција за мажи е возможна и го намалува ризикот од несакана бременост.”
Сепак, тест периодот на лекот веќе е во застој – бидејќи само 20 од мажите (од вкупно 320, не заборавајте) сметале дека несаканите ефекти од инјекцијата се неиздржливи, па донесена е одлука дека е потребно да се направат повеќе истражувања за истите да се намалат. Овие несакани ефекти вклучуваат депресија, болка во мускулите, промени во расположението, акни и промени на либидото.
Ви звучат ли познато некои од овие несакани ефекти? Секако, тоа се оние незначајни несакани ефекти од контрацепциската таблета, која ја користат 48% од жените на возраст од 16-19, 64% од жените на возраст од 20-24 и мнозинството (55%) од оние на возраст од 25-29.
Колку тажно за овие сироти мажи – не можеле да ги поднесат несаканите ефекти со кои многу жени мора да се справуваат секој ден за да избегнат несакана бременост. Жените мораат да ја поднесат одговорноста за контрацепција уште од денот кога таблетата била лансирана во 1962 – заедно со несаканите ефекти кои одат со неа.
Кога станува збор за контрацепција, медицината недвосмислено им е наклонета на мажите. Жените може да бидат изложени на заболувања како депресија и акни во име на поголемото добро – превенирање на несакана бременост, а истото ниво на неудобност не смее да се очекува од мажите. Истражувачите сега ќе потрошат милиони во обид да го подобрат лекот, со цел да се намалат несаканите ефекти.
Само 20 од испитаниците рекле дека не можат да ги поднесат несаканите ефекти – повеќе од 75% рекле дека со задоволство би ја користеле контрацепцијата. Бидејќи 20 мажи биле незадоволни, тест периодот е во застој.
Ајде да го преиспитаме ова во контекст. Еден од најопасните ризици за жените кои ја користат контрацепциската таблета е зголемениот ризик од тромбоза на вените која може да биде фатална. Погодува 2 од 10.000 жени. Животите на младите жени се скратени бидејќи користат контрацепција. Совет од регулаторната комисија? “Бенефитите се поголеми од ризиците.”
Постои и зголемен ризик од рак на града: една од осум жени заболува од рак на града и е причината за смрт на 31 жена во Британија секој ден. Тука е и зголемената шанса за рак на матката и инфаркт, а меѓу другото и промени во расположението, грчеви, болки во градите, главоболки, мигрена, зголемување на телесната тежина, тешки и болни менструални циклуси, целосно прекинување на менструалниот циклус, секојдневно крварење – треба ли да се додаде нешто?
Ризиците од контрацепциската таблета се бројни и нејзината употреба не е пријатно искуство. Но жените го носат овој товар повеќе од 50 години со цел да овозможат развој на нивните врски без ризикот од бременост. Навредливо е и безобѕирно тоа што истражувачите го држат во застој овој навистина значаен тест период на машката контрацепција заради неколку минорни – да, минорни се, а ако сте жена која се жали за нив, тоа е она што и вашиот матичен лекар ќе ви го каже – несакани ефекти.
Не ги обвинувам мажите кои се откажале од тест периодот. Ги обвинувам медицинарите кои ги третираат женте како стока која може да се справи со ризикот од рак и згрутчена крв со цел да се одбегне пренаселување на светот со несакани бебиња, а во исто време не сакаат да дозволат мажите да истрпат ни најмала главоболка за истата цел.
Застојот на тест периодот на машката контрацепција е неоправдан. Доколу истражувачите не прикажат доказ дека инјекцијата го зголемува ризикот за смрт, рак – или било кој несакан ефект со непропорционално поголем ризик од облиците на контрацепција кои милијарди жени веќе ги користат – отвараат спорна дискусија.