02 Jan ЛГБТ канал на YouTube од 2013 година
Првите денови на 2013 година ќе им донесат на лезбејките, геј мажите, бисексуалните и трансродните лица уште едно интерактивно визуелно место што им е посветено само ним.
Пред седум години, Мет Фарбер го покрена првиот телезивиски канал што прикажува исклучиво ЛГБТ содржини, Logo TV. По успешните емисии „Noah’s Arc“ и „The Big Gay Sketch Show“, Фарбер одлучи да продолжи со насочување на содржината на каналот кон ЛГБТ културата и животните стилови.
Поранешниот продуцент на MTV неодамна најави покренување на нов канал наменет за ЛГБТ публиката, што го носи името Gwist – TV With a Gay Twist. Емисиите што ќе се прикажуваат на Gwist од јануари 2013 година ќе можат да се следат и на YouTube.
„Виртуелните ТВ канали се логичен чекор во развојот на светот на геј медиумите и геј забавата. Социјалните медиуми и глобалните дистрибуциски аспекти на виртуелната и мобилна телевизија се идеални за создавање програмска платформа“, изјави Фарбер.
Gwist почнува со емитување на 14 јануари, а ќе вклучува 10 програми:
1. Gwissues со Хауард Брагман: Панел дискусии за актуелните ЛГБТ теми што ќе ги модерира Хауард Брагман;
2. The Randy Rainbow Show: Емисија со скечеви и шеги за славните (ЛГБТ) личности, што ќе ја води ѕвездата на YouTube Ренди Реинбоу;
3. The Untitled Spousal Equivalent Game со Џуди Голд: Забавна игра во којашто геј и стрејт паровите ќе се натпреваруваат за да докажат дека заслужуваат еднаквост во можностите за склучување бракови. Водителка ќе биде комичарката Џуди Голд;
4. Miss Richfield 1981 Q and You: Комична емисија за советување, инспирирана од театарскиот лик Г-ѓица Ричфилд 1981;
5. So Wrong! со Луис Виртел: Емисија за анализа на ѕвездите на поп културата;
6. Love’N Mo: Лезбејски водич за секс и љубовни врски за стрејт мажи, со поранешната ѕвезда на WNBA Маргот Кларк;
7. Steam Room Stories: Емисија со група геј и стрејт мажи што во вежбалница расправаат за различни теми;
8. Gay Snackbites: Стенд-ап комедија со коментари за актуелните и најави за новите ЛГБТ стрипови;
9. Cuentin’s Caddy Commentary: Анимирана емисија што ќе ја води Метју Џенкинс;
10. Tina Cesa Ward project (TBD): Нова серија на познатата режисерка на прославената интернет серија со лезбејска тематика „Anyone But Me“.
Преземено од окно.мк.