11 Sep Телевизија НОВА дезинформира и манипулира со гледачите
Соопштение за медиуми [11.09.2017]
Комисијата за жалби, при Советот за етика на медиумите на Македонија, по жалбата поднесена од страна на Коалицијата „Сексуални и здравствени права на маргинализираните заедници“, донесе одлука со која поднесената жалба против Телевизија „Нова“ за дебатната емисија Отворено студио, ја прогласи за основана. Станува збор за дебатната емисија со наслов „За или против геј бракови“, која се емитуваше на 17 јули 2017 година на Телевизија „Нова“ (www.tvnova.mk)
Во својата одлука Комисијата за жалби најпрво утврдува дека „водителот на емисијата во неколку наврати наметнува сугестивно мислење во однос на темата, кое во себе содржи елементи коишто можат да поттикнат дискриминација по различна основа (во случајот, сексуална). Со тоа, Комисијата најде дека се прекршени членовите 1, 10, 11 и 13 од Кодексот на новинарите на РМ. Во продолжение Комисијата утврдува дека водителката на дебатата, своите мислења ги камуфлира како факти, со што води кон дезинформирање и манипулација со публиката.
Во емисијата за која станува збор, водителката во ниту еден момент не се обиде да реагира на исказите на говорниците. Наместо тоа, таа дополнително помага во засилувањето на стереотипите кон хомосексуалците во текот на емисијата, бидејќи ги поврзува хомосексуалните бракови со „разорувањето на македонското семејство“. Дополнително, на дебатата немаше претставници од ЛГБТИ заедницата, кои би го кажале својот став за темата.
Преку оваа емисија, медиумот фаворизира ставови кои содржат говор на омраза против лицата со хомосексуална ориентација и ги стигматизира нехетеросексуалците преку изјави кои имаат за цел создавање на ирационален страв од ЛГБТИ лицата и поттикнување вербално и физичко насилство кон нив.
Медиумите и јавноста можат да говорат против геј бракови или против унапредување на кое било право на ЛГБТ лицата и без да употребуваат говор на омраза. Но исказите со кои хомосексуалноста се квалификува како болест се говор на омраза и истите се базирани на предрасуди, а не на научна вистина.
Коалицијата „Сексуални и здравствени права на маргинализирани заедници“, ја поздравува одлуката на Комисијата за жалби и ја повикуваат Телевизија Нова да ја почитува одлуката и јавно да ја објави. Истовремено ги повикуваат и другите медиуми истата да ја имаат предвид кога известуваат за ЛГБТИ луѓето.
Во прилог одлуката на Комисијата за жалби. Коалиција СЗПМЗ vs. телевизија Нова
Лице за контакт
Јана Коцевска 075 299 877