25 Jun Иран затвори издавач поради „промоција“ на геј секс и неморалност
Иранските власти затворија позната издавачка куќа поради сомневање дека промовирала „хомосексуалност, инцест и вонбрачни сексуални односи помеѓу мажи и жени“.
На 8-ми јуни, Иранските власти решија целосно да ја затворат ‘Cheshmeh’ (што значи „Пролет“ на персиски јазик), една од водечките издавачки куќи во Иран, која е особено почитувана во иранските книжевни, академски и интелектуални кругови.
Првичното објаснување на повлекувањето на лиценцата на ‘Cheshmeh’ од страна на владата, беше дека некои од книгите на издавачот ги навредувале религиозните чувства.
Меѓутоа, минатиот петок (22-ри јуни), Бахман Дори, заменикот министер во министерството за култура и исламско образование изјави за иранските медиуми дека обвинувањата против ‘Cheshmeh’ се пошироки од само навредување на религиозните чувства, и вклучуваат „промоција на хомсексуалност, инцест и неморални сексуални релации“.
Според Дори, содржината на некои од книгите на ‘Cheshmeh’ била толку експлицитна што дури и службениците за цензура биле засрамени при нивното оценување.
Како одговор на овие обвинувања, Хусеин Ализаде, од интернционалната комисија за геј и лезбејски човекови права изјави: „Одлуката на иранската влада да ја затвори ‘Cheshmeh’ е совршен пример како законот за содомија и анти-ЛГБТ хистеријата му наштетува на целото општество, вклучувајќи ги и интелектуалците и членовите на граѓанското општество кои се едноставно заинтересирани за проучување на прашањето на хомосексуалноста“.
Горји Мерзбан, ирански ЛГБТ активист и претседавач на Ориенталната Квир Организација, со седиште во Австрија, има поинакво разбирање за значењето на забраната: „Всушност оваа забрана не претставува прашање поврзано со ЛГБТ популацијата. Постојат осум други издавачки куќи кои се забранети од страна на владата, од кои ‘Cheshmeh’ е само еден пример.“
„Иранските власти постојано се однесуваат на ист начин – велат дека книгите содржат различни неморални параграфи. Владата на Иран дури и забрани книга на Пауло Коељо поради тоа што се работи за романтична новела во која ирачко-ирански пар прави прељуба“.